داع السيلْ / قصيدة زجلية بقلم: شذى الكلمات

قالو ليه إمتى داع لما…؟؟

قاليهم منين ما بقات كلمة….

منين تفرق الشمل و تفركتات اللمة

داع السيل… الصادق يقولو عليه هبيل

الكاذب الناس ليه تميل

لمتخلق منبوذ و الفاسد جالس تما

لي جابو النهار يديه الليل

الربح ما بقى ف لكثير و لا لقليل

المال ما بقى حلال، الدرهم هْمْ مسقي بالسم

والغمة داع السيل…

لمرا ديك الحرمة ولىَّ عندها خليل

ما همها القال و القيل

وخى يكون على راسها منديل

الشرف اصْرْف و العرض بات في الذمة

داع السيل… الراجل ما تلا خاجل بسروالو طايح دليل

يَا كِيْتْنَا يا الندامة ما بقات شهامة

ولى غير الويل تباعت الرجلة فسوق الفجلة من تْمَّا

طاحت الهمة داع السيل…

ولاد اليوم، العكز و النوم

 آش هاذ الجيل ما ليه مثيل..؟؟

ف يْدُّو دبلوم، من الخدمة محروم

ف ظل التعديل لحق التشغيل

الولد الصغير فالزنقة مشرد من الحق مجرد

للويل معرض عاطيها للشمة محروم من النعمة

تنزعات من القلوب الرحمة داع السيل…

كثر الظلم و القتيل بنادم ساب

الشر دار النياب

شاعل النار بالفتيل ساد لفساد في الأمة

 عمرات لقلوب بالغمة داع السيل فزمانا تبدل حالنا

حملنا على ظهرنا هْمْ ثقيل

حقوقنا مهضومة، صواتنا مكتومة ، يدينا معدومة بالظلم و التنكيل

الفتحة ولات كسرة رجعات حسرة

و اللمة فقدات الضمة و غابت البسمة داع السيل

و الحديث طويل، هذا غير تحصيل ..

شدى الكلمات 04/04/2016